Bye 2019 , Hello 2020
睇番一年前的相簿，看著舊畫面，感覺上唔似已經係一年前嘅事。
(對，柯豬媽做咗阿媽之後長期金魚記憶，要靠睇相簿先記得發生過咩事)
柯豬家姐面珠墩肉少咗，身體長高咗。今年升上K2，除了日常課堂仲參加了兩個課外活動和同學仔一齊唱歌跳舞。家姐愈大個口齒愈伶俐，間中會講說話串番佢嘅父母。最近較特別嘅對話係同我講佢唔想上大學(!?) 小學都未上經已驚定上大學？阿媽(反眼) 回答表示，上唔上大學唔緊要，但唔該你快啲瞓覺！(當時係夜晚瞓覺時間，上晒床關燈，喊住兩行眼淚同我講的)
些莉妹仲係小矮人咁樣，無明顯長高但努力向横發展。一年前頭髮短及肩，一年後已經長到背脊近半位置，生髮能力很强。九月時開始上幼稚園，基本上用咗兩個星期就適應 (當然之後都係有出現唔捨得媽媽但只會喊一陣) ，出乎意料地快，仲以為阿妹要喊幾個月。在學校很受老師的喜愛，鐘意逗佢開心。每日番學同家姐上演姐妹情深的戲碼，家長離開學校後阿妹就會自己走去家姐的班房揾柯豬，放學嗰時又係咁，老師和校工都習慣了。
除了照顧兩姐妹和看護佢地成長，2019亦是柯豬爸媽忙碌到極點的一年，上半年的重點主要是「搬屋」。
一月周圍格價，百貨公司、傢俬店、電器店、樓上鋪、online，睇到眼花。
二月將要嘅大型傢具電器逐一訂購 (因農曆新年前通常有大減價)。
五月收樓兼安排送貨、安裝，入晒傢具電器再嚟大清潔。地板我抹咗不下10次，但仲係一撻撻，所以揾清潔公司做一次深層清潔，然後和柯豬爸螞蟻搬家咁一點一點地將生活日用品帶去新居。
折騰至八月底終於柯豬家正式有了自己的「家」。
(成個過程好辛酸😭)
2019下半年，我唔需要多講，正常香港人都知發生咩事。日子很難過，無數瞓唔著嘅夜晚，瞓著然後驚醒嘅夜晚，拎住電話睇直播嘅夜晚，睇到手震眼淚滿面嘅夜晚。我深信2020的情況唔會喺短期內變好，更可能持續惡化，墜落的人繼續墜落，人性早已丟去垃圾筒。
不過，同時柯豬媽又覺得好感恩，有幸看到什麼是 ｢這是最壞的時候，這是最好的時候｣。香港人原來咁有愛，有堅持，有良心，有創意，有行動力，有決心。咁樣嘅香港人，可能近20年都係從未見過的。
最後，柯豬一家希望同大家預祝：2020新一年，好人一生平安。
#柯豬姐與些莉妹 #2020新年
Search